Tadau di baino 4tv Kotuu 2010, tadau minggu, nakaambit zou do iso nipi di kivaa no do duvo sodop miaga ditia osusui id siibo:
Miampai di savo ku, minugad zikoi id panambazangan do Sangti Michael id Penampang, om tuminakad zikoi tuminanud di talun alun do mininsavat. Miaga do nakatanud nogi ih tobpinai ku Michael, nga kivaa do au songkuo isido kadansaan do maapanau tu noontok haid do 'stroke'. Kiva do minononsunud dogo do kivaa nogi do panambazangan koduvo, ih onini mantad di doguvang, ih buanon di paganakan di Lim (Tan Ah Sang) om panambazangan nopo diti nga okon ko tumanud do koubasanan do Roman Catholic.
Di potunai dagai do minuhi, nokito ku do maso todoon ih papas do sumampaping di talun-alun tagazo; nga kiva do sompuun kazu do poinhobong nadadi do susuzon. Ka doid ginavo ku, 'ta, oubat iti kazu, tu mangan ii ukado om iduo tu gontian do simin.' Dadi, kinamai ku no do minongukad om koidu no ih sontob tohomok, koohu po ih hugu. Paganu zou no do todsok om uviho kuno ih tu kiva do duvo ngopod hobi kaki ninau. Kouvi ku nopo ih, poingisano kuno ih nga kohivid no gisom do duminapas di padang id siibo om potuunai ku no do guminusa; nga kohoilan ku nopo nga maidhaid ih do minghuvid nga mazogazo ih, gisom do nohivid id bavang id doos tuunon di Emmanuel Tindahal. Ontok nopo dii nga nokihuzud ih bavang om koosi zou do ouhun ih tu kivaa do tudu ku do maganu di. Kokito ku no do minsazo nogi ih om gusa zou no do huminozog. Kadampot ku nopo ih, ovito ku no do minindisan,
Miaga ko songinan vogok tagazo do nopiumanan ku; nga okon ko panakaon nga gontian nogi, onuo ku no ih usin do noohu id tozibut ku do hihimo po ngopod ringgit om pataak kuno di songuhun. Ovito ku no ih do tumininda tu poinsuang do kalung. Tahib zou no di hamin ngaavi doid disan do bavang om koongou kuno ih songuhun mohoing tondu, ih Joguim (savo di Leduin Mobijohn), do minuoot do songkuo nokobohi ku om simba zou no do, 'himo ngopod ringgit'. Miaga ko noindadaman oh hoogo, ' na, nokuo tu au nu bohizon iho dogo?,' ka di tiuot dosido. Aiso do sisimba ku nga potihombusai ku no do minamanau.
Koikot zou no id nizonon di Kuntai, nga ogumu kopizo id tazu disido, dadi noikot ngaavi do minogusig; habus no isido miampai ngaavi di tuhun pakakalaja disido om igitai no dioho ih tasu ngaavi di. Tahib zou no do poinsaan di kalung. "Ta, nunu ino," ka disido, " vuhanut do mahasong," kangku. "Ogumu po doiho id bavang," kangku do minongoput. "Ba, tahib no," ka disido.
Di mamaso zou do tumahib, tood om tingkukub zou no; kopiumanai ku no do mangagos do takod di tasu (miga huminabus mantad di kalung) om ovito ku no doid disan bavang di tuunon di Liuba (doos id hamin za id Kg. Nampasan) om miaga ko kiva vagu do iso po kalung do pisasaan ku om id suang nopo dii nga mondou; nonuan zou do pandatan apasagi nga miaga do tinoodo mantad binulang. Kivaa do toondom ku do momohonod di duvo binatang - tasu om mandou - tu akanon. Onuo ku no ngaavi ih kalung di om pohosodo ku no id vaig doid tatanga do bavang id tuunon dagai id Kg. Nampasan. Ontok nopo dii nga au songkuo do aahom ih vaig dii. Nimangan ku tuduho miampai di pandatan do mooi do ohosod om ohonod ngaavi ih. Ontok nopo do miningkuluod ih mondou, minongokot daa do pahad ku nga au ih nokosobot tu poinsuang id kalung. Kohonod om kapatai nopo ngaavi ih, koposik zou no. Au zou nakalati do nunu oh komozon, nga osianan zou om oluo oh ginavo ku tu nohonod ku ih tasu om mondou - tanda naku do tavasi toi talaat: kakal zou do mokianu do kointahangan mantad do Kinoingan.
No comments:
Post a Comment